తెలంగాణ వాతావరణ అప్‌డేట్: మార్చి 30–31 వరకు భారీ వర్షాలు మరియు వడగళ్ల వాన హెచ్చరిక

తెలంగాణ రాష్ట్రవ్యాప్తంగా గత కొన్ని రోజులుగా భానుడి భగభగలతో అల్లాడిపోతున్న ప్రజలకు వాతావరణ శాఖ చల్లని కబురు అందించింది. రేపటి నుంచి అంటే మార్చి 30, 31 తేదీల్లో రాష్ట్రంలోని పలు జిల్లాల్లో బలమైన ఉరుములు, మెరుపులతో కూడిన వర్షాలు కురిసే అవకాశం ఉందని హైదరాబాద్ వాతావరణ కేంద్రం హెచ్చరికలు జారీ చేసింది.

తీవ్రమైన ఉరుములు..

వాతావరణ మార్పుల నేపథ్యంలో ఉత్తర, పశ్చిమ, మధ్య, దక్షిణ తెలంగాణ జిల్లాల్లో వాతావరణం ఒక్కసారిగా మారిపోనుంది. ముఖ్యంగా మధ్యాహ్నం నుంచి రాత్రి వరకు ఈ జిల్లాల్లో తీవ్రమైన ఉరుములు, మెరుపులతో కూడిన వర్షాలు వచ్చే అవకాశం ఉంది. వాతావరణ శాఖ అంచనా ప్రకారం.. కొన్ని ప్రాంతాల్లో బలమైన గాలులు వీచడమే కాకుండా.. అక్కడక్కడా వడగండ్ల వాన కురిసే ప్రమాదం కూడా ఉంది. పిడుగులు పడే అవకాశం ఉన్నందున రైతులు, ప్రజలు చెట్ల కింద లేదా బహిరంగ ప్రదేశాల్లో ఉండరాదని అధికారులు సూచించారు.

హైదరాబాద్‌కు ఊరట..

రాష్ట్ర రాజధాని హైదరాబాద్‌ విషయానికి వస్తే.. మార్చి 30, 31 తేదీల్లో నగరవాసులకు ఎండ వేడి నుంచి ఉపశమనం లభించనుంది. మధ్యాహ్నం తర్వాత ఆకాశం మేఘావృతమై, సాయంత్రం లేదా రాత్రి సమయాల్లో ఒకసారి తీవ్రమైన ఉరుములతో కూడిన వర్షం కురిసే అవకాశం ఉంది. దీనివల్ల గత కొన్ని రోజులుగా నమోదవుతున్న గరిష్ట ఉష్ణోగ్రతలు తగ్గి, వాతావరణం కాస్త చల్లబడుతుంది.

వడగండ్ల వాన, బలమైన గాలుల వల్ల పంటలకు నష్టం వాటిల్లే అవకాశం ఉన్నందున, రైతులు తగిన జాగ్రత్తలు తీసుకోవాలి. ముఖ్యంగా కోత దశలో ఉన్న పంటలను సురక్షిత ప్రాంతాలకు తరలించుకోవాలని వాతావరణ శాఖ అధికారులు సూచిస్తున్నారు. గాలులు వీస్తున్న సమయంలో విద్యుత్ తీగలకు దూరంగా ఉండాలి. మెరుపులు వస్తున్నప్పుడు ఎలక్ట్రానిక్ వస్తువుల వాడకాన్ని తగ్గించాలన్నారు. వర్షం పడే సమయంలో వాహనదారులు జాగ్రత్తగా ప్రయాణించాలని, ముఖ్యంగా లోతట్టు ప్రాంతాల్లో నీరు నిలిచే అవకాశం ఉన్నందున అప్రమత్తంగా ఉండాలని సూచించారు. మొత్తానికి ఈ రెండు రోజుల వర్షాలు అటు ఎండల తీవ్రతను తగ్గించడంతో పాటు, రాష్ట్రవ్యాప్తంగా వాతావరణాన్ని మార్చివేయనున్నాయి.